Gure Lana

Une honetan, hainbat ikerketa, esku-hartze eta prestakuntza proiektu ditugu martxan. Horien artean, ezagunena “Ongi etorri eskolara” proiektua da, Donostiako Udaleko Kultur Aniztasunaren Bulegoarekin, Errenteriako Udaleko Hezkuntza Sailarekin eta Andoaingo Gizarte Zerbitzuen Sailarekin elkarlanean aurrera eramaten duguna. Proiektu honetan Gipuzkoako Foru Aldundiak eta Eusko Jaurlaritzak ere parte hartzen dute.

“Ongi etorri eskolara” proiektuak ikasgelan eta ikastetxean kulturarteko ikuspegia lantzen du, eskola-komunitatea sentsibilizatuz eskola osatzen duten kultura guztiei balioa emanez, eta kultura horiek aldi berean, euskal kultura eta euskararen inguruan interesatu daitezen.

Horretarako, ikasleekin, irakasleekin, irakasle ez diren langileekin, familiekin eta eragile komunitarioekin ere lan egiten dugu. Kultur aniztasuna ikastetxe eta komunitatearentzako abantailatzat hartzea du helburu.
Hori posible izan dadin, gizarte- eta hezkuntza- arloko laguntza, hurbiltasun harremanak eta elkar ezagutzea lantzen ditugu Familia Laguna programaren bitartez.

Programa honek hainbat herrialdetatik Gipuzkoara emigratu diren familiak familia euskaldunekin harremanetan jartzen ditu, bi kulturen arteko zubia sortuz. Donostiako, Andoaingo eta Errenteriako 210 familiek parte hartu zuten “Familia Laguna” programan 2021-22 ikasturtean.

Proiektu honetaz gain, kulturarteko sentsibilizaziorako formakuntza eta tailer ezberdinak diseinatu eta ematen ditugu eta hezkuntza arloan aniztasun kulturala kudeatzeko era berriak ikertzen ditugu.

Gure eskolek mila kolore dituztelako